میکسیکو: (رائیٹ ناؤ نیوز) میکسیکو کی معروف بیوٹی انفلوئنسر ایڈریانا گارشیا کاسمیٹک سرجری کے دوران انتقال کر گئیں۔ یہ واقعہ ریاست سینالووا کے ایک نجی کلینک میں پیش آیا۔

رپورٹس کے مطابق ایڈریانا گارشیا کا منگل کے روز آپریشن ہو رہا تھا جب اچانک پیچیدگیاں پیدا ہوئیں۔ طبی عملے کی تمام کوششوں کے باوجود ان کی جان بچائی نہ جا سکی۔

مقامی حکام نے موت کی حتمی وجہ جاری نہیں کی ہے، تاہم تحقیقات کا آغاز کر دیا گیا ہے۔ حکام سرجری کے دوران پیش آنے والے حالات اور ممکنہ طبی غفلت کا جائزہ لے رہے ہیں۔

ایڈریانا گارشیا سوشل میڈیا پر مشہور تھیں، جہاں ان کے انسٹاگرام پر 90 ہزار سے زائد فالوورز تھے۔ ان کے انتقال کی تصدیق ان کے برانڈ پارٹنر نے بھی کی ہے۔

واضح رہے کہ کاسمیٹک سرجری کے دوران پیچیدگیاں عالمی سطح پر ایک اہم مسئلہ بن چکی ہیں، جس کے باعث کئی اموات ہو چکی ہیں۔