برلن: (رائیٹ ناؤ نیوز) جرمنی نے بحیرۂ احمر میں تعینات اپنے دو جنگی بحری جہاز واپس بلانے کا اعلان کیا ہے۔ یہ فیصلہ امریکا اور ایران کے درمیان حالیہ سفارتی پیش رفت کے بعد لیا گیا ہے۔

جرمن وزارت دفاع کے مطابق واپس بلائے جانے والے جہازوں میں ‘فلڈا’ مائن ہنٹر اور ‘موزیل’ سپورٹ شپ شامل ہیں۔ یہ جہاز جون میں نہر سویز کے راستے بحیرہ احمر پہنچے تھے۔

جہازوں کے ساتھ تقریباً 140 اہلکار بھی تعینات تھے، جن میں بارودی سرنگیں صاف کرنے والے غوطہ خور اور سکیورٹی ٹیمیں شامل تھیں۔ جرمنی نے ان جہازوں کو ایران کی ممکنہ بارودی سرنگوں کے خدشے کے پیش نظر تیار رکھا تھا۔

جرمنی کے وزیر دفاع نے کہا ہے کہ آبنائے ہرمز میں فوجی مشن سیاسی صورتحال کی بنیاد پر ہوگا۔ یہ مشن عالمی بحری راستوں کی آزادانہ جہاز رانی کے تحفظ کے لیے تھا۔

یاد رہے کہ جرمنی نے لبنان کے ساحل پر اقوام متحدہ کے امن مشن یونیفل میں اپنی بحری شمولیت برقرار رکھنے کا بھی اعلان کیا ہے۔ مشرق وسطیٰ کی سکیورٹی صورتحال غیر یقینی تصور کی جاتی ہے۔