واشنگٹن: (رائیٹ ناؤ نیوز) امریکا اور ایران کے درمیان دو روزہ فضائی اور میزائل حملوں کے بعد کشیدگی میں کمی آئی ہے۔ دونوں ممالک کے وزرائے خارجہ کی سطح پر بات چیت کے بعد وقتی طور پر حملے روک دیے گئے ہیں۔

عالمی خبر رساں ادارے کے مطابق پاکستان، قطر اور عمان کی سفارتی کوششوں نے مشرق وسطیٰ میں کشیدگی کو کم کرنے میں مدد دی ہے۔ ان کوششوں سے امریکا ایران مذاکرات کی بحالی کی امید بھی پیدا ہوئی ہے۔

ذرائع کے مطابق ثالث ممالک کی کوشش ہے کہ فریقین مزید حملوں سے گریز کریں اور متنازع امور پر مذاکرات کریں۔ ان امور میں آبنائے ہرمز میں جہاز رانی، پابندیاں اور سکیورٹی معاملات شامل ہیں۔

امریکا نے ایران کے جنوبی علاقوں میں عسکری تنصیبات، میزائل لانچنگ سائٹس اور تہران کے قریب اہداف کو نشانہ بنایا تھا۔ امریکی حکام کے مطابق یہ حملے آبنائے ہرمز میں تجارتی جہازوں پر حملوں کا جواب تھے۔

یاد رہے کہ آبنائے ہرمز ایک اہم تیل کی گزرگاہ ہے، جس پر کسی بھی عسکری کارروائی کا تیل کی قیمتوں اور عالمی تجارت پر اثر پڑ سکتا ہے۔