اسلام آباد: (رائیٹ ناؤ نیوز) وفاقی وزیر برائے آئی ٹی شزا فاطمہ خواجہ نے اعلان کیا ہے کہ ٹیلی کام بل سے کسی کی ذاتی زمین اور جائیداد پر زبردستی قبضہ نہیں ہوگا۔ انہوں نے کہا کہ قانون سازی اتفاق رائے سے کی جا رہی ہے۔

شزا فاطمہ نے وفاقی وزیر قانون کے ہمراہ پریس کانفرنس میں بتایا کہ ٹیلی کام بل پر عوام اور پارلیمان کو آگاہ کرنا ضروری تھا۔ ان کا کہنا تھا کہ پرانا قانون موجودہ دور کی ضروریات سے مطابقت نہیں رکھتا تھا۔

انہوں نے بطور آئی ٹی منسٹر تیز ترین انٹرنیٹ کی فراہمی کی ذمہ داری کا ذکر کیا اور کہا کہ بل 6 مہینے قومی اسمبلی میں رہا۔ انہوں نے کہا کہ بل کو سینیٹ کی کمیٹی میں روکا گیا جسے جمہوریت کا حسن کہا۔

شزا فاطمہ نے کہا کہ بل میں 6 ترامیم شامل کی گئیں اور یہ بنیادی طور پر ان ہاؤسنگ سوسائٹیز کے حوالے سے تھا۔ شہری اگر اپنی پراپرٹی انٹرنیٹ کے لئے نہیں دینا چاہتے تو یہ ان کا قانونی حق ہے۔

واضح رہے کہ بل پر شزا فاطمہ اور سیکرٹری آئی ٹی کے خلاف میڈیا میں الزامات لگائے گئے تھے۔ ان کا کہنا ہے کہ الزامات کی انکوائری کرائی جائے اور وہ مالی الزامات پر قانونی کارروائی کا حق رکھتے ہیں۔