اسلام آباد: (رائیٹ ناؤ نیوز) وزیراعظم کے مشیر برائے سیاسی امور رانا ثنا اللہ نے کہا ہے کہ پی ٹی آئی کے آزاد جموں و کشمیر انتخابات کے بائیکاٹ سے انتخابی عمل پر کوئی اثر نہیں پڑے گا۔ انتخابات آئین کے مطابق اپنے وقت پر ہوں گے اور عوام بھرپور شرکت کریں گے۔

رانا ثنا اللہ نے کہا کہ آزاد کشمیر کے عوام انتخابات کے حوالے سے پرجوش ہیں۔ ہر حلقے میں امیدواروں کی تعداد ڈبل فیگر میں ہے، جس سے انتخابی سرگرمیوں کی شدت کا اندازہ ہوتا ہے۔

ان کا کہنا تھا کہ بائیکاٹ کا اعلان کرنے والوں کے پاس امیدوار بھی موجود نہیں، اس لیے ان کے فیصلے سے انتخابی عمل متاثر نہیں ہوگا۔ جمہوریت میں اختلافات کے باوجود انتخابات میں حصہ لینا ہی درست ہے۔

انہوں نے مزید کہا کہ پاکستان نے آزاد کشمیر کے لیے بے شمار قربانیاں دی ہیں۔ تین جنگیں لڑ چکا ہے اور حالیہ معرکۂ حق میں بھی افواج نے جانوں کی قربانیاں دے کر دفاع کیا۔

واضح رہے کہ وزیراعظم کی جانب سے پی ٹی آئی کو مذاکرات کی دعوت دی جاچکی ہے، تاہم بانی پی ٹی آئی سیاسی بات چیت پر یقین نہیں رکھتے، جس سے ڈیڈ لاک برقرار ہے۔ رانا ثنا اللہ نے مکالمے اور انتخابی سیاست کا راستہ اختیار کرنے پر زور دیا۔