اسلام آباد: (رائیٹ ناوٴ نیوز) اسلام آباد ہائیکورٹ نے پی ٹی اے ٹربیونل میں 18 مئی تک ممبر فنانس تعینات کرنے کا حکم دیا ہے۔ عدالت نے خبردار کیا کہ عدم تعیناتی پر وزیراعظم خود پیش ہوکر وضاحت دیں۔

اسلام آباد ہائیکورٹ میں پی ٹی اے ٹریبونل کے ممبر فنانس کی تعیناتی کے کیس کی سماعت ہوئی۔ جسٹس محسن اختر کیانی نے سخت ریمارکس دیے کہ ممبر کی تعیناتی میں تاخیر ناقابل برداشت ہے۔

عدالت نے سیکرٹری کابینہ اور سیکرٹری کو بھی آئندہ سماعت پر طلب کر لیا ہے۔ اسسٹنٹ اٹارنی جنرل نے بتایا کہ ریٹائرڈ جج کو ٹریبونل کا ممبر تعینات کیا گیا ہے۔

جسٹس کیانی نے کہا کہ ریٹائرڈ ججز کی تعیناتی مسائل پیدا کرتی ہے۔ اداروں میں تعیناتی کا عمل شفاف اور بروقت ہونا لازمی ہے۔

واضح رہے کہ پی ٹی اے ٹربیونل میں ممبر فنانس کی تعیناتی کا معاملہ طویل عرصے سے زیر التوا ہے، جس پر عدالت نے برہمی کا اظہار کیا ہے۔