کیلیفورنیا: (رائیٹ ناوٴ نیوز) ایپل کے سی ای او ٹِم کُک نے اپنے عہدے سے مستعفی ہونے کا اعلان کیا ہے۔ وہ موسمِ گرما تک اپنی خدمات جاری رکھیں گے تاکہ منتقلی کا عمل مکمل ہو سکے۔ اس کے بعد وہ بورڈ کے ایگزیکٹو چیئرمین بن جائیں گے۔

کمپنی کے سینئر نائب صدر برائے ہارڈویئر انجینئرنگ جان ٹرنس یکم ستمبر سے ایپل کے نئے سربراہ ہوں گے۔ ٹِم کُک نے ایپل کے ساتھ اپنے تعلق کو زندگی کا بڑا اعزاز قرار دیا اور کہا کہ ان کا اگلا قدم منتقلی ہے، الوداعی نہیں۔

یہ پیش رفت 2025 کے اواخر میں ایپل کی اعلیٰ قیادت میں تبدیلیوں کے بعد سامنے آئی، جن میں اے آئی چیف اور دیگر اہم عہدیداران کی رخصتی شامل ہے۔

ٹِم کُک نے 2011 میں سی ای او کا عہدہ سنبھالا اور ایپل کو آئی فون سے آگے بڑھاتے ہوئے سروسز، ویئریبلز اور صحت کے شعبوں میں وسعت دی۔ ان کے دور میں ایپل واچ، ایئر پوڈز اور ایپل ٹی وی پلس جیسی مصنوعات سامنے آئیں۔

واضح رہے کہ حالیہ عرصے میں ایپل کو مصنوعی ذہانت اور ورچوئل ریئلٹی میں چیلنجز کا سامنا رہا۔ جان ٹرنس، جو 2001 سے ایپل کے ساتھ وابستہ ہیں، ان کے دور میں سری اور ممکنہ فولڈ ایبل آئی فون میں بڑی اپڈیٹس متوقع ہیں۔