اسلام آباد: (رائیٹ ناوٴ نیوز) ارسا نے ملک کے آبی ذخائر اور صوبوں کو فراہم کیے جانے والے پانی کے اعداد و شمار جاری کر دیے ہیں۔

ارسا کے مطابق، صوبہ پنجاب کو گزشتہ روز کے مقابلے میں 1100 کیوسک زیادہ پانی فراہم کیا جا رہا ہے۔ دو روز میں پنجاب کے پانی کے حصص میں 11 ہزار 200 کیوسک کا اضافہ ہوا ہے۔ آج پنجاب کو 55 ہزار 900 کیوسک، سندھ کو 50 ہزار کیوسک، اور بلوچستان کو 500 کیوسک پانی فراہم کیا جا رہا ہے۔

ارسا کے جاری کردہ اعداد و شمار کے مطابق خیبر پختونخواہ کو 2 ہزار 300 کیوسک پانی فراہم کیا جا رہا ہے۔ پانی کی زائد فراہمی سے پن بجلی کی پیداوار میں اضافہ ہوگا اور شارٹ فال میں کمی آئے گی۔ چاروں صوبوں کو آج مجموعی طور پر 1 لاکھ 8 ہزار 700 کیوسک پانی فراہم کیا جا رہا ہے۔

دریائے سندھ میں پانی کی آمد 36 ہزار 400 کیوسک اور اخراج 30 ہزار کیوسک ریکارڈ کیا جا رہا ہے۔ دریائے جہلم میں پانی کی آمد 32 ہزار 300 کیوسک اور اخراج 30 ہزار کیوسک ہے۔ چشمہ بیراج میں پانی کی آمد 68 ہزار 300 کیوسک اور اخراج 54 ہزار 900 کیوسک ہے۔ دریائے چناب میں پانی کی آمد 17 ہزار 500 کیوسک اور اخراج 5 ہزار 100 کیوسک ہے، جبکہ دریائے کابل میں پانی کی آمد اور اخراج 47 ہزار 200 کیوسک ریکارڈ کیا جا رہا ہے۔

واضح رہے کہ ارسا کی جانب سے جاری کردہ اعداد و شمار سے پانی کی منصفانہ تقسیم کو یقینی بنایا جاتا ہے اور صوبوں کی ضروریات کو پورا کیا جاتا ہے۔