کراچی: (رائیٹ ناوٴ نیوز) طبی ماہرین نے خبردار کیا ہے کہ ہائی بلڈ پریشر یا ‘ہائیپر ٹینشن’ دل کی صحت کے لیے ایک خاموش خطرہ ہے۔ یہ دل کے دورے، فالج اور گردوں کے مسائل کا سبب بن سکتا ہے۔ ڈاکٹروں کے مطابق، باقاعدگی سے بلڈ پریشر چیک کرنا دل کی حفاظت کا بہترین طریقہ ہے۔

ماہرین کے مطابق، بلڈ پریشر چیک کرنے کی ضرورت ہر شخص کے لیے مختلف ہو سکتی ہے۔ یہ آپ کی صحت اور عمر پر منحصر ہے۔ اگر آپ صحت مند ہیں اور بلڈ پریشر معمول پر ہے تو ہر 6 سے 12 ماہ بعد چیک اپ کافی ہے۔

ذیابیطس، موٹاپا یا دل کے امراض میں مبتلا افراد کو ہفتے میں کم از کم ایک بار یا ڈاکٹر کی ہدایت کے مطابق چیک کرنا چاہیے۔ ہائی بلڈ پریشر کے مریضوں کو گھر پر روزانہ مانیٹرنگ کرنی چاہیے تاکہ ادویات کے اثرات کا پتہ چل سکے۔

بلڈ پریشر چیک کرنے کا بہترین وقت صبح ہوتا ہے، جب آپ نے ابھی ناشتہ یا دوا نہ لی ہو۔ ماہرین صحت کا کہنا ہے کہ وقت اور طریقہ کار درست ریڈنگ کے لیے اہم ہیں۔

واضح رہے کہ بلڈ پریشر کو متوازن رکھنے کے لیے طرزِ زندگی میں تبدیلی ناگزیر ہے۔ نمک کی مقدار کم کریں، پھل و سبزیاں زیادہ کھائیں، اور ہفتے میں کم از کم 150 منٹ پیدل چلیں یا تیراکی کریں۔