اسلام آباد: (رائیٹ ناوٴ نیوز) سینیٹ کی قائمہ کمیٹی برائے داخلہ کے اجلاس میں ایک اہم حکومتی بل کی منظوری دی گئی ہے۔ ترمیمی بل کے تحت نادرا کو اختیار دیا گیا ہے کہ وہ کسی بھی شہری کا شناختی کارڈ 60 روز کے لیے بلاک کر سکے۔

تفصیلات کے مطابق، بل کا مسودہ حتمی منظوری کے لیے سینیٹ کے آئندہ اجلاس میں پیش کیا جائے گا۔ وزارت داخلہ نے کہا ہے کہ شناختی کارڈ حساس اور قومی سلامتی کی دستاویز ہے، جس کا غلط استعمال سیکیورٹی اور معیشت کے لیے خطرہ بن سکتا ہے۔

وزارت داخلہ کے مطابق، قانون کی عدم موجودگی کی وجہ سے نادرا کو سنگین آپریشنل رکاوٹوں کا سامنا ہے۔ جرائم پیشہ افراد قانونی کارروائی سے بچنے کے لیے بہانے بناتے ہیں، اور اتھارٹی کو مؤقف دینے کی بجائے جان بوجھ کر قانونی کارروائی سے بچتے ہیں۔

یہ ترمیم نادرا کو کسی بھی شخص کا شناختی کارڈ بلاک کرنے کا اختیار دے گی۔ اس سے قانونی کارروائی کے عمل کو مزید مؤثر بنایا جا سکے گا۔

واضح رہے کہ نادرا کا ادارہ ملک کی شناختی دستاویزات کے معاملات کو سنبھالنے والا اہم ادارہ ہے، اور اس کی کارکردگی قومی سلامتی کے لیے اہمیت رکھتی ہے۔