ڈیرہ بگٹی: (رائیٹ ناؤ نیوز) بلوچستان کی معروف لوک گلوکارہ مائی صوبھائی کو ڈیرہ بگٹی میں فائرنگ کر کے قتل کر دیا گیا ہے۔ پولیس کے مطابق مائی صوبھائی پر نامعلوم مسلح افراد نے فائرنگ کی، جس کے بعد وہ موقع پر ہی جاں بحق ہو گئیں۔

پولیس نے بتایا کہ واقعے کی تحقیقات شروع کر دی گئی ہیں، لیکن ملزمان کی شناخت یا گرفتاری عمل میں نہیں آئی ہے۔ مائی صوبھائی کی موت کے محرکات کا تاحال پتہ نہیں چل سکا ہے۔

مقامی ذرائع کے مطابق مائی صوبھائی کو ان کی گلوکاری کی وجہ سے مخالفت کا سامنا تھا۔ تاہم پولیس نے اس بات کی تصدیق نہیں کی ہے۔

اس واقعے نے بلوچستان کے فنکارانہ حلقوں میں افسوس کی لہر دوڑا دی ہے۔ مقامی موسیقی کی ترقی میں مائی صوبھائی کا اہم کردار تھا جسے لوگ ہمیشہ یاد رکھیں گے۔

واضح رہے کہ مائی صوبھائی ڈیرہ بگٹی قبیلے کی پہلی خاتون گلوکارہ تھیں جنہوں نے اپنی آواز کے ذریعے مقامی موسیقی کو فروغ دیا۔