بیجنگ: (رائیٹ ناؤ نیوز) چین نے جدید ہائپرسونک ہتھیار تیار کیے ہیں جو ہزاروں کلومیٹر دور فوجی طیاروں کو نشانہ بنانے کی صلاحیت رکھتے ہیں۔ ان ہتھیاروں میں ہائپرسونک گلائیڈ وہیکلز اور فضا سے فضا میں مار کرنے والے میزائل شامل ہیں۔

رپورٹ کے مطابق، چین کے تیار کردہ ہائپرسونک وہیکلز طویل فاصلے پر موجود کمانڈ اینڈ کنٹرول طیاروں کو نشانہ بنا سکتے ہیں۔ یہ طیارے فضائی کارروائیوں میں اہم کردار ادا کرتے ہیں کیونکہ یہ لڑاکا طیاروں کو معلومات اور ایندھن فراہم کرتے ہیں۔

چینی ہتھیار اگر جنگ میں استعمال ہوں تو دشمن کی فضائی کارروائیوں اور دفاعی نظام کو شدید نقصان پہنچا سکتے ہیں۔ چین نے بعض ہائپرسونک میزائلوں میں فضا سے فضا میں حملے کی صلاحیت بھی شامل کی ہے۔

چین کی اس پیشرفت کو امریکا کے لیے اہم سمجھا جارہا ہے کیونکہ دونوں ممالک کے درمیان ممکنہ فوجی تصادم میں طویل فاصلے تک مار کرنے والے ہتھیار فیصلہ کن کردار ادا کر سکتے ہیں۔

یاد رہے کہ چین کی میزائل صلاحیت میں اضافہ ہوا ہے اور امریکی محکمہ دفاع کے مطابق 2024 تک چین کے پاس 3,150 بیلسٹک میزائل موجود تھے۔ چین کی اس پیشرفت سے عالمی سلامتی پر اثرات مرتب ہو سکتے ہیں۔