تہران: (رائیٹ ناؤنیوز) ایرانی حکومت نے فیلڈ مارشل سید عاصم منیر کے دورۂ ایران کو کامیاب اور نتیجہ خیز قرار دیا ہے۔ اس دوران قابلِ قدر سفارتی کامیابیاں حاصل کی گئیں، جن کا مقصد دونوں ممالک کے تعلقات کو مضبوط کرنا ہے۔

ایرانی صدارتی دفتر کے عہدیدار سید مہدی طباطبائی نے بتایا کہ اس دورے کے دوران اہم سفارتی پیش رفت ہوئی ہے۔ انہوں نے کہا کہ دورے کے نتائج جلد ہی سامنے آنا شروع ہوجائیں گے۔

وفاقی وزیرِ داخلہ محسن نقوی نے بھی ایرانی صدر سے ملاقات کو مثبت اور نتیجہ خیز قرار دیا ہے۔ انہوں نے سوشل میڈیا پر بتایا کہ ایران امریکا تنازع اور مشرقِ وسطیٰ میں کشیدگی پر تبادلۂ خیال ہوا۔

ایرانی صدر نے اپنی حکومت کے مؤقف اور تحفظات پر کھل کر بات کی۔ محسن نقوی نے امید ظاہر کی کہ یہ ملاقات خطے میں پائیدار امن کی راہ ہموار کرنے میں مدد دے گی۔

یاد رہے کہ پاکستان اور ایران کے درمیان سفارتی روابط کو مضبوط کرنے کے لئے دونوں ممالک کے درمیان بات چیت جاری ہے۔ یہ دورہ اسی سلسلے کی ایک کڑی ہے۔