تہران: (رائیٹ ناؤنیوز) ایرانی صدر مسعود پزشکیان نے اسلامی اقوام کے اتحاد کو دشمن کی سازشوں کا واحد توڑ قرار دیا ہے۔ انہوں نے عراق کی سپریم جوڈیشل کونسل کے سربراہ سے ملاقات میں کہا کہ اسلامی اقوام کے اتحاد سے خطے سے امریکی انخلا ممکن ہوگا۔

ایرانی صدر نے کہا کہ دشمن وسائل پر قبضے کے لیے جنگ بھڑکانے کی کوشش کر رہا ہے۔ انہوں نے کہا کہ مغربی ایشیا کے مسلمان ایک امت ہیں اور ان کا طرز عمل تقویٰ کے جذبے سے ہونا چاہیے۔

صدر مسعود پزشکیان نے مزید کہا کہ دشمن معاشی بے چینی پیدا کرنا چاہتا ہے۔ ان کا کہنا تھا کہ دشمن جان چکا ہے کہ فوجی طاقت سے ہمیں شکست نہیں دی جا سکتی۔

انہوں نے کہا کہ امریکا کے ساتھ معاہدے خوف یا دباؤ کی بنیاد پر نہیں کیے گئے تھے۔ ان کا کہنا تھا کہ اسلامی اقوام میں بیداری اور اتحاد سے ہی دشمن کی کوششوں کو ناکام بنایا جا سکتا ہے۔

یاد رہے کہ ایران کی قیادت اسلامی اتحاد کے فروغ پر ہمیشہ زور دیتی رہی ہے۔ یہ بیان ایسے وقت میں آیا ہے جب خطے میں کشیدگی بڑھ رہی ہے اور اتحاد کی ضرورت محسوس کی جا رہی ہے۔