اسلام آباد: (رائیٹ ناؤ نیوز) وفاقی وزیر اطلاعات عطا تارڑ نے کہا ہے کہ ڈیجیٹل دور میں غلط معلومات اور گمراہ کن مواد کا تدارک ناگزیر ہے۔ ان کا کہنا تھا کہ پیشہ ورانہ، بروقت اور ذمہ دارانہ ابلاغی حکمت عملی ضروری ہے۔

54ویں کامن ٹریننگ پروگرام کے تحت زیر تربیت افسران نے ڈیجیٹل کمیونی کیشن ڈیپارٹمنٹ کا دورہ کیا۔ وفد کے ارکان نے وفاقی وزیر اطلاعات عطا تارڑ سے ملاقات کی اور حکومتی ابلاغ پر بریفنگ حاصل کی۔

وفد میں 12 مختلف گروپس کے 217 افسران شامل تھے، جن میں 117 مرد اور 100 خواتین شامل تھیں۔ زیر تربیت افسران کو قومی بیانیے اور عوامی آگاہی کے بارے میں آگاہ کیا گیا۔

وزیر اطلاعات نے زیر تربیت افسران سے بدلتے میڈیا منظرنامے پر تبادلہ خیال کیا۔ افسران نے ڈیجیٹل کمیونی کیشن ڈیپارٹمنٹ کی بریفنگ کو مفید قرار دیا اور حکومتی ابلاغ میں دلچسپی ظاہر کی۔

یاد رہے کہ مؤثر حکومتی ابلاغ عوام کا ریاستی اداروں پر اعتماد مضبوط بناتا ہے۔ عطا تارڑ نے نوجوان افسران کو دیانتداری اور قومی مفاد کو مقدم رکھنے کی تاکید کی۔