واشنگٹن: (رائیٹ ناؤنیوز) امریکی صدر ڈونلڈ ٹرمپ نے کینیڈا پر تنقید کرتے ہوئے کہا ہے کہ وہ ریاست بنے بغیر ریاست جیسے فوائد چاہتا ہے۔ یہ بیان امریکا اور کینیڈا کے درمیان تجارتی مذاکرات کی ناکامی کے بعد آیا ہے جن میں دونوں ممالک نے ایک دوسرے کی مصنوعات پر محصولات عائد کرنے کا اعلان کیا ہے۔

صدر ٹرمپ نے سوشل میڈیا پلیٹ فارم پر کہا کہ کینیڈا نے امریکی کسانوں پر بھاری ٹیرف عائد کیے ہیں جو مزید برداشت نہیں کیے جائیں گے۔ انہوں نے کہا کہ کینیڈا کو امریکا کی ’51ویں ریاست’ بنانے کی بات پر کینیڈا میں ناراضگی پائی جاتی ہے۔

کینیڈا کے وزیر اعظم مارک کارنی نے امریکی محصولات کو غلط اندازہ قرار دیا اور کہا کہ ان کا مقصد کینیڈا کو نقصان پہنچانا ہے۔ انہوں نے امریکی مصنوعات پر جوابی ٹیرف عائد کرنے کا اعلان کیا ہے۔

نئے ٹیرف کے تحت کینیڈین مصنوعات پر 50 فیصد درآمدی محصولات نافذ ہوگئے ہیں جس سے 20 ارب ڈالر مالیت کی اشیاء متاثر ہوں گی۔ کینیڈا نے جواب میں ‘ڈالر کے بدلے ڈالر’ کی پالیسی اپنانے کا اعلان کیا ہے۔

واضح رہے کہ کینیڈا اور امریکا کے درمیان جمعے کو ہونے والے مذاکرات بغیر کسی معاہدے کے ختم ہوگئے تھے، جس سے دونوں ملکوں کے گہرے تجارتی تعلقات متاثر ہوئے ہیں۔