اسلام آباد: (رائیٹ ناؤ نیوز) وزیراعظم شہباز شریف نے کہا ہے کہ پاکستان کے پانی کی ایک ایک بوند ہماری ریڈ لائن ہے۔ بھارت راہ راست پر نہ آیا تو براہ راست جواب دیا جائے گا۔ ہم جنگ نہیں بلکہ امن چاہتے ہیں لیکن امن کی خواہش کو کمزوری نہ سمجھا جائے۔

تقریب سے خطاب کرتے ہوئے وزیراعظم نے یادگار فتح کی اہمیت پر روشنی ڈالی۔ انہوں نے کہا کہ یہ فتح ہماری قوم کے عزم اور مسلح افواج کی پیشہ ورانہ مہارت کا ثبوت ہے۔ یہ یادگار فتح دشمن کے مقابلے میں ہماری برتری کی علامت ہے۔

انہوں نے مزید کہا کہ مئی 2025 کے معرکے نے پاکستان کے وقار میں غیرمعمولی اضافہ کیا ہے۔ اگر کسی نے پاکستان کی خودمختاری کو چیلنج کیا تو اسے سخت جواب دیا جائے گا۔ بھارت نے سندھ طاس معاہدے کو معطل کرکے خود کو امن کا دشمن ثابت کیا ہے۔

واضح رہے کہ وزیراعظم نے خطے میں استحکام اور امن کی ضمانت دینے کے عزم کا اظہار کیا ہے۔ انہوں نے کہا کہ ہم تنازعات کو اقوام متحدہ کے اصولوں کے مطابق حل کرنا چاہتے ہیں۔ پاکستان نے ایران اور امریکا کے درمیان ثالثی میں اہم کردار ادا کیا ہے۔

یاد رہے کہ شہباز شریف نے سعودی عرب اور ترکیہ کے ساتھ دفاعی معاہدوں کی اہمیت پر زور دیا ہے۔ انہوں نے کہا کہ یہ معاہدے مشرق وسطیٰ کے لیے امن کی بشارت ہیں اور پاکستان کی علاقائی استحکام کی کوششوں کا حصہ ہیں۔