اسلام آباد: (رائیٹ ناؤ نیوز) وزیراعظم شہباز شریف نے خبردار کیا ہے کہ نوجوانوں کو جدید علوم سے نہ جوڑا گیا تو پاکستان ترقی کی دوڑ میں پیچھے رہ جائے گا۔ انہوں نے یہ بات وفاقی دارالحکومت میں نوجوانوں کے عالمی دن کی تقریب سے خطاب کرتے ہوئے کہی۔

وزیراعظم نے کہا کہ دانش سکولز کا دائرہ کار دیگر صوبوں تک بڑھایا جا رہا ہے اور صوبائی حکومتوں کو بھی ایسے معیاری تعلیمی ادارے قائم کرنے چاہئیں۔ ان کا کہنا تھا کہ معیاری تعلیم کے بغیر ترقی ممکن نہیں ہے۔

انہوں نے لیپ ٹاپ تقسیم کے پروگرام کا حوالہ دیتے ہوئے بتایا کہ اس وقت تنقید کا سامنا کرنا پڑا، لیکن آج یہی لیپ ٹاپ نوجوانوں کو جدید علوم تک رسائی میں مدد دے رہے ہیں۔

شہباز شریف نے مزید کہا کہ کچھ لوگوں نے لیپ ٹاپ کو صرف ایک مشین سمجھا، لیکن وہ اسے ایک مشن سمجھتے ہیں۔ انہوں نے عزم ظاہر کیا کہ نوجوانوں کو جدید ٹیکنالوجی اور تعلیم کے مواقع فراہم کرنے کا مشن جاری رہے گا۔

یاد رہے کہ وزیراعظم نے اپنے دور حکومت میں پنجاب میں لیپ ٹاپ تقسیم کا پروگرام شروع کیا تھا، جس کا مقصد نوجوانوں کو جدید علوم سے جوڑنا اور معیاری تعلیم کے مواقع فراہم کرنا ہے۔