اسلام آباد: (رائیٹ ناؤ نیوز) پاکستان اور جاپان کے درمیان 35 کروڑ جاپانی ین کی گرانٹ کے معاہدے پر دستخط ہوگئے ہیں۔ اس معاہدے کے تحت وفاقی سول سروس افسران کو جاپان میں ماسٹرز کیلئے 16 اور پی ایچ ڈی کیلئے ایک اسکالرشپ دی جائے گی۔

دستخط کی تقریب وزارت اقتصادی امور میں منعقد ہوئی جس میں جاپانی سفارتخانے، جائیکا اور وزارت کے اعلیٰ حکام نے شرکت کی۔ 22 لاکھ ڈالر کے مساوی گرانٹ معاہدے پر سیکرٹری اقتصادی امور محمد حمیر کریم، سینئرجوائنٹ سیکرٹری میران محی الدین سومرو اور جائیکا کے چیف نمائندے یوسوکے شینوزاکی نے دستخط کیے۔

ریکارڈ آف ڈسکشنز پر دستخط جاپانی سفیر اکاماتسو شوئیچی نے کیے۔ 2018 سے اب تک جے ڈی ایس اسکالرشپ کے تحت آٹھ بیچز مستفید ہو چکے ہیں جس سے افسران کی استعداد کار میں اضافہ ہوا ہے۔

پاکستانی حکومتی افسران کو جاپان مختلف قلیل مدتی تربیتی کورسز کے لیے بھی باقاعدگی سے مدعو کرتا ہے۔ یہ اقدامات دونوں ممالک کے تعلقات کو مضبوط بنانے میں مددگار ثابت ہو رہے ہیں۔

یاد رہے کہ جاپان پاکستان کے ساتھ مختلف شعبوں میں تعاون کرتا رہا ہے، جس میں تعلیم اور تربیت کی فراہمی شامل ہے۔ یہ اقدام دونوں ممالک کے درمیان تعلقات کو مزید مستحکم کرنے میں مددگار ثابت ہوگا۔