اسلام آباد: (رائیٹ ناؤ نیوز) حکومت نے فیصل آباد الیکٹرک سپلائی کمپنی (فیسکو) کی نجکاری کے عمل میں اہم پیش رفت کی ہے۔ نجکاری کمیشن نے بتایا کہ 12 سرمایہ کار گروپس نے فیسکو میں حصص خریدنے کی خواہش ظاہر کی ہے۔

ان میں 8 پاکستانی اور 4 غیر ملکی گروپس شامل ہیں۔ پاکستانی گروپس میں نشاط گروپ، اینگرو انرجی، اور حب پاور ہولڈنگز شامل ہیں جبکہ ترک اور چینی کمپنیاں بھی دلچسپی رکھتی ہیں۔

وفاقی کابینہ نے 3 بجلی تقسیم کار کمپنیوں کی نجکاری کی منظوری دی ہے۔ فیسکو کی نجکاری 2016 میں رک گئی تھی، اب یہ کوشش دوبارہ شروع ہوئی ہے۔

نجکاری کمیشن کے چیئرمین محمد علی نے کہا کہ سرمایہ کاروں کی دلچسپی بجلی تقسیم کار شعبے پر اعتماد کا اظہار ہے۔ ان کا کہنا تھا کہ نجکاری کا مقصد نظام کی کارکردگی اور صارفین کی خدمات کو بہتر بنانا ہے۔

واضح رہے کہ فیسکو، گیپکو اور آئیسکو نجکاری کے پہلے مرحلے میں شامل ہیں۔ گیپکو کے لیے آخری تاریخ 21 اگست جبکہ آئیسکو کے لیے 7 ستمبر ہے۔