کراچی: (رائیٹ ناؤ نیوز) وزیراعلیٰ سندھ مراد علی شاہ نے واضح کیا ہے کہ سندھ کو مزید صوبوں میں تقسیم نہیں کیا جا سکتا۔ انہوں نے کہا کہ صوبائی اسمبلی پہلے ہی سندھ کی تقسیم کے خلاف کئی قراردادیں منظور کر چکی ہے۔

مراد علی شاہ نے مائننگ ٹیکنیکل کانفرنس 2026 کے بعد میڈیا سے گفتگو کرتے ہوئے کہا کہ پاکستان کے آئین میں نئے صوبوں کے قیام کا طریقہ کار واضح ہے۔ اس کے تحت متعلقہ صوبائی اسمبلی کی دو تہائی اکثریت سے قرارداد کی منظوری لازمی ہے۔

وفاقی وزیر داخلہ محسن نقوی کے بیان پر ردعمل دیتے ہوئے مراد علی شاہ نے کہا کہ سندھ اسمبلی نے کئی بار سندھ کی تقسیم کے خلاف قراردادیں منظور کی ہیں۔ اگر اس مؤقف میں تبدیلی آئی تو اس پر بات ہو سکتی ہے۔

مراد علی شاہ نے مزید کہا کہ سندھ کے عوام کو پاکستان پیپلز پارٹی کی حکومت پر مکمل اعتماد ہے کہ وہ صوبے کے مفادات کا ہر صورت تحفظ کرے گی۔ انہوں نے کہا کہ صوبوں کی تقسیم پر لاشیں نہیں گرنے دیں گے۔

واضح رہے کہ سندھ اسمبلی نے پہلے بھی سندھ کی تقسیم کے خلاف قراردادیں منظور کی ہیں اور یہ معاملہ سیاسی منظرنامے پر مستقل موضوع بحث رہا ہے۔