اسلام آباد: (رائیٹ ناؤ نیوز) پاکستان کرکٹ ٹیم کے سابق کپتان رمیز راجہ نے ضیا الحق کے دور کا ایک غیر معمولی واقعہ بیان کیا ہے۔ انہوں نے کہا کہ گوجرانوالہ میں فرسٹ کلاس کرکٹ میچ کے دوران سرعام کوڑے مارنے کی سزا دی گئی تھی۔

رمیز راجہ نے بتایا کہ چار روزہ میچ کے آغاز میں اسٹیڈیم تقریباً خالی تھا، لیکن اچانک ہزاروں افراد اسٹیڈیم پہنچنے لگے۔ کچھ دیر بعد پولیس اہلکار میدان میں داخل ہوئے اور کھلاڑیوں کو حیران کر دیا۔

پولیس نے کپتان سے وکٹیں ہٹانے کی درخواست کی، جس کے بعد سزا یافتہ شخص کو میدان میں لایا گیا۔ اس شخص کو شارٹ لیگ کی پوزیشن کے قریب کھمبے سے باندھ کر سرعام کوڑے مارے گئے۔

سابق کپتان کے مطابق، کوڑے مارنے والا شخص تیز گیند باز کی طرح دوڑ لگا کر وار کرتا تھا۔ واقعہ کے بعد سزا یافتہ شخص نے تماشائیوں کی طرف ہاتھ بھی ہلایا، جس پر مزاحیہ تبصرے ہوئے۔

واضح رہے کہ جنرل ضیا الحق کے دور میں بعض جرائم کی سزا کے طور پر سرعام کوڑے مارنے کی سزائیں دی جاتی تھیں۔ اس واقعے کو رمیز راجہ نے ایک انٹرویو میں ماضی کی یادوں کے طور پر بیان کیا، جس نے سوشل میڈیا پر توجہ حاصل کی۔