سوات: (رائیٹ ناؤ نیوز) سوات کے علاقے کبل میں پولیس اسٹیشن کے قریب خودکش دھماکے میں 9 افراد جاں بحق اور متعدد زخمی ہوگئے۔ ڈی آئی جی مالاکنڈ نے بتایا کہ حملہ آور نے پولیس اسٹیشن میں داخل ہونے کی کوشش کی، مگر اہلکاروں نے اسے روک دیا۔

ریسکیو 1122 کے مطابق سیدو شریف اسپتال میں 9 افراد کی ہلاکت کی تصدیق کی گئی ہے۔ مزید ہلاکتوں کا خدشہ ظاہر کیا جا رہا ہے جبکہ دھماکے کے مقام سے ایک سر ملا ہے جو خودکش حملہ آور کا ہو سکتا ہے۔

پولیس کے مطابق دھماکہ کبل چوک میں احتجاج کے دوران ہوا۔ علاقے کو گھیرے میں لے لیا گیا اور شواہد اکٹھے کیے جا رہے ہیں۔ زخمیوں کو مختلف اسپتالوں میں منتقل کیا گیا ہے۔

وفاقی وزیر داخلہ محسن نقوی نے حملے کی مذمت کی ہے۔ انہوں نے پولیس اہلکاروں کی قربانیوں کو سراہتے ہوئے شہید اہلکاروں کو خراج تحسین پیش کیا اور زخمیوں کی جلد صحتیابی کی دعا کی۔

واضح رہے کہ سوات پولیس اور ضلعی انتظامیہ نے جلسے کے غیر قانونی ہونے کی وارننگ جاری کی تھی۔ عوام کو شرکت سے منع کیا گیا تھا کیونکہ اس کے لیے کوئی این او سی نہیں دیا گیا تھا۔