مظفرآباد: (رائیٹ ناؤ نیوز) آزاد کشمیر کے انتخابات کے دوسرے مرحلے میں، حلقہ ایل اے 28 لچھراٹ کی 3 یونین کونسلز میں پولنگ کا عمل دن ایک بجے تک شروع نہ ہو سکا۔ ان یونین کونسلز میں پنجگراں، پنجکوٹ اور نوسیری نوسدہ شامل ہیں۔

ذرائع کے مطابق، پولنگ عملہ اور انتخابی سامان رات بھر ہونے والی بارش کے باعث مظفرآباد میں پھنس گیا، جس کی وجہ سے پولنگ سٹیشنز پر مقررہ وقت پر نہ پہنچ سکا۔ اس کی وجہ سے 15 سے 20 ہزار ووٹرز اپنا حق رائے دہی استعمال کرنے سے محروم رہ گئے۔

پولنگ کے آغاز میں تاخیر پر سیاسی کارکنوں اور امیدواروں نے الیکشن کمیشن کے انتظامات پر شدید تنقید کی ہے۔ حلقہ ایل اے 28 لچھراٹ 10 یونین کونسلز پر مشتمل ہے، جن میں سے 3 میں پولنگ متاثر ہوئی۔

مظفرآباد ڈویژن کے دیگر علاقوں میں بھی پولنگ کا عمل جاری ہے، جہاں ٹرن آوٹ 20 سے 30 فیصد تک رہا۔ تاہم، بارش اور لینڈ سلائیڈنگ کی وجہ سے بعض علاقوں میں انتخابی عمل تعطل کا شکار ہوا۔

واضح رہے کہ مظفرآباد ڈویژن میں مجموعی طور پر 9 میں سے 8 نشستوں پر پولنگ جاری ہے، جبکہ ایل اے 27 کوٹلہ میں پولنگ 4 اگست کو ہوگی۔ سکیورٹی کے فول پروف انتظامات کئے گئے ہیں تاکہ ووٹرز بلا خوف و خطر اپنا حق رائے دہی استعمال کر سکیں۔