لاہور: (رائیٹ ناؤ نیوز) سیدنا علی ہجویریؒ کے 983 ویں عرس کی تقریبات کا آغاز ہو گیا ہے۔ ملک بھر سے لاکھوں عقیدت مند دربار پر حاضری دے رہے ہیں، جس کے لیے سکیورٹی کے سخت انتظامات کیے گئے ہیں۔

تقریبات کا آغاز مزار شریف پر چادر پوشی کی رسم سے ہوا، جس میں نائب وزیراعظم اسحاق ڈار نے شرکت کی۔ اس موقع پر ملک کی سلامتی، امن و استحکام کے لیے خصوصی دعائیں کی گئیں۔

تقریب میں صوبائی وزراء اور اعلیٰ حکام کی موجودگی اہمیت کی حامل رہی۔ اس کے علاوہ اوقاف کے افسران بھی موجود تھے، جو انتظامات کی نگرانی کر رہے ہیں۔

عرس کے دوران عبادات، دعاؤں اور روحانی محافل کا سلسلہ جاری ہے۔ تقریباً 5 ہزار پولیس اہلکار سکیورٹی کے فرائض سرانجام دے رہے ہیں۔

یاد رہے کہ عرس کے موقع پر زائرین کے لیے لنگر اور دودھ کی سبیل کا انتظام کیا گیا ہے۔ تین روزہ عرس کے دوران ٹریفک، طبی امداد اور صفائی کے مکمل انتظامات کیے گئے ہیں۔