کراچی: (رائیٹ ناؤ نیوز) شہر قائد کی 5 ڈسپنسریوں کو 24 گھنٹے فعال اسپتالوں میں تبدیل کرنے کے پہلے منصوبے کا سنگ بنیاد رکھ دیا گیا ہے۔ وفاقی وزیر صحت مصطفیٰ کمال نے جیکب لائن میں گورنمنٹ ڈسپنسری کے توسیعی منصوبے کی تقریب میں شرکت کی۔

وفاقی وزیر صحت نے کہا کہ اس منصوبے کے تحت گورنمنٹ ڈسپنسری کو ایک جدید فیڈرل کمیونٹی ہیلتھ اینڈ پریونشن سروس سینٹر میں تبدیل کیا جا رہا ہے۔ یہ ڈسپنسری صبح 8 سے 2 بجے تک کھلی رہتی تھی، لیکن اب یہ 24 گھنٹے فعال اسپتال بنے گی۔

مصطفیٰ کمال نے بتایا کہ یہ اسپتال 30 بستروں پر مشتمل ہوگا اور صحت کی بنیادی سہولیات فراہم کرے گا۔ کراچی میں 2 ارب 86 کروڑ 50 لاکھ روپے کی رقم مختص کی گئی ہے تاکہ مزید ڈسپنسریوں کو جدید اسپتالوں میں تبدیل کیا جا سکے۔

انہوں نے کہا کہ 3 ماہ بعد یہ ڈسپنسری مکمل طور پر 24 گھنٹے فعال اسپتال بن جائے گی۔ وفاقی حکومت کی جانب سے کراچی کی 5 ڈسپنسریوں کو جدید اسپتالوں میں تبدیل کرنے پر کام جاری ہے۔

واضح رہے کہ اٹھارہویں ترمیم کے بعد اسپتال بنانے کا اختیار صوبائی حکومتوں کو منتقل ہوچکا ہے۔ وفاقی وزیر نے کراچی کے دیگر علاقوں میں بھی ڈسپنسریوں کو فعال کرنے کی اہمیت پر زور دیا۔