اسلام آباد: (رائیٹ ناؤنیوز) وزیراعظم شہباز شریف نے کہا کہ پاکستان ڈیجیٹل اتھارٹی حکومتی خدمات میں انقلاب لائے گی۔ قومی مربوط ڈیجیٹل پالیسی فریم ورک پر عملدرآمد کے جائزہ اجلاس کی صدارت کرتے ہوئے اہم فیصلے کیے گئے ہیں۔

اجلاس میں وفاقی اداروں میں ڈیجیٹل گورننس، مرکزی ڈیٹا مینجمنٹ اور جدید شہری سہولیات کے فروغ کے لیے اقدامات طے کیے گئے۔ شہباز شریف نے ہدایت کی کہ وفاقی اداروں کو قومی مرکزی ڈیٹا سینٹر اسکائی 47 کی سہولیات فراہم کی جائیں۔

وزیراعظم نے کہا کہ ڈیٹا یکجا کرنے سے قومی وسائل کی بچت ہوگی اور الگ الگ ڈیٹا سینٹرز کی ضرورت ختم ہو جائے گی۔ اس سے حکومتی اخراجات میں کمی اور انتظامی امور میں بہتری آئے گی۔

یہ اقدام حکومتی خدمات کو جدید خطوط پر استوار کرنے میں انقلابی کردار ادا کرے گا۔ قومی ڈیجیٹل ویژن کی اہمیت پر زور دیتے ہوئے کہا کہ یہ ایک جدید معاشرے کی تشکیل میں کلیدی اہمیت رکھتا ہے۔

واضح رہے کہ قومی ڈیجیٹل پالیسی عالمی شراکت داری کو فروغ دینے میں معاون ثابت ہوگی اور بین الاقوامی فورمز پر پاکستان کی نمائندگی کو مزید مضبوط بنائے گی۔