اسلام آباد: (رائیٹ ناؤنیوز) وزیراعظم شہباز شریف نے تاجروں کے مسائل حل کرنے کے لیے چیئرمین ایف بی آر اور سینئر افسران کو خصوصی ہدایات جاری کی ہیں۔ انہوں نے ایف بی آر اصلاحات پر ہفتہ وار اجلاس میں ٹیکس اصلاحات اور محصولات میں اضافے پر غور کیا۔

وزیراعظم نے ہدایت کی کہ ٹیکس کی استعداد کے تخمینے کے لیے جامع اور سائنٹیفک طریقہ کار وضع کیا جائے۔ انہوں نے پاور سیکٹر کے ساتھ تعاون کرتے ہوئے قانونی کارروائی کی تاکید کی۔

وزیراعظم نے ایف بی آر کی ٹیم کی کاوشوں کی تعریف کی اور کہا کہ ٹیکس نظام میں رہتے ہوئے ضابطوں کی پابندی کرنے والے افراد قوم کا قیمتی سرمایہ ہیں۔ انہوں نے کاروباری برادری کے مسائل کے بروقت حل کی ہدایت بھی کی۔

وزیراعظم نے مزید کہا کہ ٹیکسٹائل، مشروبات، اسٹیل اور دیگر صنعتوں میں ڈیجیٹل نگرانی کا نظام دسمبر تک فعال کیا جائے۔ ایف بی آر میں تقرریاں میرٹ کی بنیاد پر ہوں گی اور اچھی کارکردگی دکھانے والوں کو یوم آزادی پر ایوارڈز دیے جائیں گے۔

واضح رہے کہ ایف بی آر کی جانب سے پیداواری شعبے میں ٹریکنگ نظام کی تنصیب جاری ہے۔ اس نظام کی بدولت 560 ارب روپے کے ٹیکس کی استعداد کار سے فائدہ اٹھایا جا سکے گا۔