کراچی: (رائیٹ ناؤنیوز) واٹس ایپ نے ویب ورژن کے لیے آڈیو اور ویڈیو کالز کی سہولت فراہم کردی ہے۔ اب صارفین ویب پر بھی یہ کالز کر سکیں گے۔

نئے فیچر میں اسکرین شیئرنگ اور ری ایکشنز کی سہولت بھی شامل کی گئی ہے۔ ویب ورژن میں نیا کالز ٹیب بھی موجود ہوگا، جہاں کال ہسٹری اور فیورٹ کانٹیکٹس دیکھی جا سکتی ہیں۔

واٹس ایپ کے مطابق ویب پر ہونے والی کالز کو مکمل اینڈ ٹو اینڈ انکرپشن حاصل ہوگی۔ کالز کے دوران کسی قسم کی ٹائم لمٹ نہیں ہوگی۔

صارفین کال کو ایک ڈیوائس سے دوسری پر بلاتعطل منتقل کر سکیں گے۔ مثلاً موبائل ایپ سے واٹس ایپ ویب یا ڈیسک ٹاپ ایپ پر منتقل کیا جا سکتا ہے۔

یاد رہے کہ واٹس ایپ نے حالیہ برسوں میں اپنی سروسز میں مسلسل بہتری کی ہے، تاکہ صارفین کو بہترین تجربہ فراہم کیا جا سکے۔