لاہور: (رائیٹ ناؤنیوز) لاہور سمیت پنجاب کے مختلف شہروں میں شدید بارش سے نشیبی علاقے زیر آب آگئے اور شاہراہوں پر پانی جمع ہوگیا، جس سے ٹریفک کا نظام متاثر ہوا۔ محکمہ موسمیات نے بتایا کہ مون سون کی بارشوں کا نیا سسٹم 5 جولائی تک جاری رہ سکتا ہے۔ بارش سے گرمی کی شدت میں کمی آئی اور موسم خوشگوار ہوگیا۔ پی ڈی ایم اے نے بارشوں کے پیش نظر الرٹ جاری کر دیا ہے۔ لاہور میں نکاسی آب کے لیے واسا کا عملہ متحرک ہے۔ لاہور میں مغل پورہ میں سب سے زیادہ 44 ملی میٹر بارش ریکارڈ کی گئی۔ دیگر علاقوں میں بھی مختلف مقدار میں بارش ہوئی۔ لاہور، راولپنڈی، گجرانوالہ سمیت کئی شہروں میں اربن فلڈنگ کا خدشہ ظاہر کیا گیا ہے۔ مری اور گلیات میں لینڈ سلائیڈنگ کا خطرہ ہے۔ لاہور ٹریفک پولیس نے شہریوں کو احتیاطی تدابیر اپنانے کی ہدایت دی ہے۔ یاد رہے کہ گزشتہ سال بھی مون سون بارشوں کے سبب پنجاب کے کئی علاقے متاثر ہوئے تھے اور شہریوں کو مشکلات کا سامنا کرنا پڑا تھا۔