بھارت میں فلائٹ آپریشن مفلوج ہونے سے انڈر 19 اور انڈر 16 کرکٹرز مشکلات کا شکار ہو گئے، ریاستی ٹیموں کو وینیوز پر پہنچنے میں مشکلات ہیں۔
نئی دہلی: (رائیٹ ناوٴ نیوز) بھارت میں فلائٹ آپریشن مفلوج ہونے کی وجہ سے انڈر 19 اور انڈر 16 کرکٹرز شدید مشکلات کا شکار ہو گئے ہیں۔ انڈر 19 کوچ بہار اور وجے مرچنٹ ٹرافی میں حصہ لینے والی ٹیمیں بھی متاثر ہوئیں۔
بھارتی میڈیا کے مطابق فلائٹ آپریشن کی منسوخی کی وجہ سے ڈومیسٹک ایج گروپ کرکٹرز ائیرپورٹس پر پھنس گئے ہیں جبکہ ٹورنامنٹس ملک کے مختلف وینیوز پر پیر سے شروع ہو رہے ہیں اور ریاستی ٹیموں کو وینیوز پر پہنچنے میں مشکلات کا سامنا کرنا پڑ رہا ہے۔
کرکٹ ایسوسی ایشنز نے ٹیموں کو بسوں کے ذریعے وینیوز پر بھیجنے کا فیصلہ کیا ہے۔ بنگال اور مقبوضہ کشمیر کی ٹیمیں بھی بسوں پر روانہ ہوئی ہیں۔
بھارتی کرکٹ بورڈ کے صدر متھن منہاس نے کہا ہے کہ یہ ایک مشکل وقت ہے اور اگر ریاستی ٹیمیں تاخیر سے پہنچتی ہیں تو میچز ایک دن تاخیر سے شروع ہوں گے۔
