ماسکو: (رائیٹ ناؤ نیوز) روسی صدر ولادیمیر پیوٹن نے ایران کے ماسکیٹو فلیٹ کی تعریف کی ہے۔ پیوٹن نے کہا ہے کہ یہ چھوٹی تیز رفتار کشتیاں جدید ٹیکنالوجی اور ہتھیاروں سے لیس ہیں اور جنگی کارروائیوں میں مؤثر ثابت ہو رہی ہیں۔

پیوٹن نے روسی بحریہ کے افسران سے ملاقات کے دوران مشرق وسطیٰ کے تنازع کا حوالہ دیا۔ انہوں نے کہا کہ ایران نے اپنے ماسکیٹو فلیٹ کا استعمال کرتے ہوئے اپنی جنگی کارروائیوں کو مؤثر بنایا ہے۔

پیوٹن کا کہنا تھا کہ یہ نئی ٹیکنالوجیز کا معاملہ ہے، ہمارے پاس بھی ایسے چھوٹے جہاز ہیں۔ یہ جہاز وزن میں کم مگر جدید ہتھیاروں سے لیس ہوتے ہیں۔

ایران کے ماسکیٹو فلیٹ میں تقریباً 20 غدیر کلاس چھوٹی آبدوزیں اور کئی ہزار تیز رفتار کشتیاں شامل ہیں۔ یہ معلومات اسپوتنک نیوز ایجنسی نے فراہم کی ہیں۔

یاد رہے کہ یہ ہلکے بحری جہاز ایران کی ساحلی پٹی میں بنائی گئی سرنگوں میں چھپائے جا سکتے ہیں۔ اس کے باعث انہیں طویل فاصلے کے ہتھیاروں سے نشانہ بنانا امریکا کے لیے مشکل ہوتا ہے۔