رونالڈو نے ہالی ووڈ میں اپنی پہلی سیریز ‘ڈے ونز’ کے ذریعے قدم رکھا ہے جس میں وہ ایگزیکٹو پروڈیوسر بھی ہیں۔
لندن: (رائیٹ ناؤ نیوز) پرتگالی فٹبالر کرسٹیانو رونالڈو نے ہالی ووڈ میں قدم رکھتے ہوئے اپنی پہلی سیریز ‘ڈے ونز’ میں اداکاری شروع کر دی ہے۔ رونالڈو اس سیریز میں نہ صرف اداکار ہیں بلکہ ایگزیکٹو پروڈیوسر کی ذمہ داریاں بھی نبھا رہے ہیں۔
یہ سیریز رونالڈو کی پروڈکشن کمپنی ‘یو آر-مارو اسٹوڈیوز’ تیار کر رہی ہے جسے انہوں نے ہدایت کار میتھیو وان کے ساتھ مل کر قائم کیا۔ میتھیو وان کئی کامیاب فلموں کی ہدایت کاری کر چکے ہیں اور اس سیریز میں بھی ان کی مہارت کا مظاہرہ ہوگا۔
ڈرامے کی کاسٹ میں مشہور فرانسیسی اسٹار تھیری ہنری، اداکار ڈیمین لیوس، برطانوی ریپر ڈیو اور اداکارہ کارلوٹا بنات شامل ہیں۔ کہانی ایک فرضی فٹبال ایجنٹ اسٹینلے ڈالٹن کے گرد گھومتی ہے۔
ماہرین کا کہنا ہے کہ یہ سیریز اسٹریمنگ پلیٹ فارمز پر نمایاں کامیابی حاصل کر سکتی ہے اور فٹبال کی دنیا کو نئے انداز میں پیش کرے گی۔ یہ سیریز فٹبال کی چمک دمک کے پیچھے چھپی سیاست اور سخت مقابلے کو نمایاں کرے گی۔
یاد رہے کہ رونالڈو نے کھیل کے میدان میں بے شمار کامیابیاں حاصل کی ہیں اور اب وہ انٹرٹینمنٹ کی دنیا میں بھی اپنی صلاحیتوں کا مظاہرہ کر رہے ہیں۔ شو کی شوٹنگ شمال مغربی لندن میں جاری ہے۔
