کوئٹہ: (رائیٹ ناؤ نیوز) بلوچستان میں مون سون بارشوں کا سلسلہ جاری ہے۔ پی ڈی ایم اے نے حالیہ بارشوں کے نقصانات کی رپورٹ جاری کی ہے۔

رپورٹ کے مطابق دو ماہ میں بارشوں سے چار بچوں سمیت 8 افراد جاں بحق ہوگئے ہیں۔ مزید 16 افراد زخمی ہوئے ہیں جن میں 13 بچے شامل ہیں۔

آسمانی بجلی، دیواریں اور چھتیں گرنے سے زخمی افراد کو طبی امداد فراہم کی جا رہی ہے۔ حکام نے متاثرہ علاقوں میں امدادی کارروائیاں تیز کر دی ہیں۔

ان بارشوں کی وجہ سے 41 گھروں کو نقصان پہنچا ہے۔ سب سے زیادہ متاثر خضدار، ژوب، ہرنائی اور بارکھان میں 17 گھر مکمل تباہ اور 24 کو جزوی نقصان پہنچا ہے۔

یاد رہے کہ بلوچستان میں مون سون بارشوں کے باعث ہر سال نقصانات کا سامنا کرنا پڑتا ہے۔ حکومت نے متاثرہ علاقوں میں مزید امدادی ٹیمیں روانہ کرنے کا اعلان کیا ہے۔