مظفرآباد: (رائیٹ ناؤ نیوز) وزیراعلیٰ پنجاب مریم نواز نے مظفرآباد میں انتخابی جلسے سے خطاب کیا۔ انہوں نے کہا کہ نواز شریف کی طرح انہوں نے جو وعدے کیے ہیں، انہیں پورا کریں گی۔

مریم نواز نے کہا کہ مسلم لیگ (ن) آزاد کشمیر میں صرف ووٹ مانگنے نہیں آئی، بلکہ عوام کی خدمت کا عملی ریکارڈ ساتھ لائی ہے۔ انہوں نے کہا کہ اگر عوام نے مسلم لیگ (ن) کو منتخب کیا تو خطے کی تقدیر بدل جائے گی۔

وزیراعلیٰ نے پنجاب میں ترقیاتی منصوبوں کا ذکر کرتے ہوئے کہا کہ صوبے بھر میں ترقی نظر آتی ہے، اور آزاد کشمیر کے لیے 10 گرین الیکٹرک بسیں اور 15 موبائل ہسپتال تحفے کے طور پر دینے کا اعلان کیا۔

مریم نواز نے کشمیری بچوں کو مفت تعلیم، معذور افراد کو ہمت کارڈ، اور غریب خواتین کو مفت راشن فراہم کرنے کا وعدہ کیا۔ انہوں نے بتایا کہ پنجاب میں سات لاکھ مریضوں کو ان کے گھروں پر ادویات دی جا رہی ہیں۔

واضح رہے کہ مریم نواز نے اپنے خطاب میں سیاسی مخالفین کو بھی نشانہ بنایا اور کہا کہ جن کے اپنے صوبوں کی سڑکیں ٹوٹی ہوئی ہیں، وہ آزاد کشمیر کے مسائل کیسے حل کریں گے۔