تہران: (رائٹ ناؤ نیوز) ایران کے وزیر خارجہ عباس عراقچی نے کہا ہے کہ ایران امریکا کے ساتھ جنگ کا اختتام اس وقت کرے گا جب اسے عسکری محاذ پر برتری حاصل ہوگی۔ ان کا کہنا تھا کہ جنگ بندی کا فیصلہ میدان جنگ میں مکمل برتری کے بعد ہی کیا جائے گا۔

عباس عراقچی نے ایک انٹرویو میں بتایا کہ مذاکرات کا آغاز اس وقت ہوتا ہے جب عسکری محاذ پر قابل اعتبار کامیابی حاصل ہو جائے۔ انہوں نے کہا کہ جنگ کا خاتمہ فوجی فتح یا مذاکرات کے ذریعے ہوتا ہے، اور ان دونوں میں توازن برقرار رکھنا ضروری ہے۔

وزیر خارجہ نے کہا کہ عوام کی جانوں کا تحفظ اولین ترجیح ہے۔ سیاسی قیادت کو جنگ جاری رکھنے کے فوائد اور نقصانات کا جائزہ لے کر ہی اقدامات کرنا چاہئے۔ انہوں نے مزید کہا کہ ایران کی پالیسیوں میں کوئی تبدیلی نہیں آئی، اور ایران پہلے سے زیادہ طاقتور ہو کر ابھرا ہے۔

انہوں نے کہا کہ امریکا نے جنگ شروع کرکے ایران کی طاقت کو غلط اندازہ کیا۔ ایران کبھی امریکی دھمکیوں سے نہیں ڈرا۔ اسرائیل کے حملے ایران کے اندر سے معلومات افشا ہونے کے باعث ممکن ہوئے۔

واضح رہے کہ امریکا کے ساتھ جنگ بندی کی منظوری سپریم نیشنل سکیورٹی کونسل نے دی ہے۔ ایران نے سفارتکاری کو آزمانے کے لئے مذاکرات میں شمولیت اختیار کی ہے اور یہ معاملہ طویل مشاورت کے بعد طے پایا۔