اسلام آباد: (رائیٹ ناؤ نیوز) ادارہ شماریات نے ہفتہ وار مہنگائی کے اعداد و شمار جاری کردیے ہیں۔ رپورٹ کے مطابق ملک میں مہنگائی کی سالانہ شرح 13.52 فیصد پر آگئی جبکہ ہفتہ وار مہنگائی میں 0.98 فیصد کمی ریکارڈ کی گئی۔

ادارہ شماریات نے بتایا کہ مہنگائی میں کمی کے باوجود 23 اشیائے ضروریہ کی قیمتوں میں اضافہ ہوا۔ ٹماٹر کی قیمت میں 125.40 فیصد، پیاز 10.72 فیصد اور آلو 10.06 فیصد مہنگے ہوئے ہیں۔

انڈے اور آٹے کی قیمتوں میں بھی بالترتیب 8.32 اور 5.08 فیصد اضافہ ہوا ہے۔ دودھ، دہی اور چاول سمیت دیگر اشیاء کی قیمتوں میں بھی اضافہ ہوا ہے۔

دوسری جانب، چکن کی قیمت میں 1.97 فیصد اور کیلے کی قیمت میں 1.44 فیصد کمی ہوئی ہے۔ دالیں، چینی، پیٹرول، ایل پی جی اور لہسن کی قیمتوں میں بھی کمی دیکھی گئی ہے۔

یاد رہے کہ ملک میں مہنگائی کی شرح میں یہ تبدیلیاں مختلف عوامل کی بنا پر ہوتی ہیں جن میں عالمی منڈی کی قیمتیں بھی شامل ہیں۔