اسلام آباد: (رائیٹ ناؤ نیوز) وزیر دفاع خواجہ آصف نے کہا ہے کہ آزاد کشمیر میں ریاست مخالف عناصر کے خلاف سخت کارروائی کی جائے گی۔ یہ بات انہوں نے سماجی رابطے کی ویب سائٹ ایکس پر اپنے بیان میں کہی۔

وزیر دفاع نے مزید کہا کہ انتخابات کے قریب ہونے کے باوجود اختلافی مسائل کو عوام کی عدالت میں لے جانا جمہوری عمل کی عکاسی کرتا ہے۔ ان کا کہنا تھا کہ کچھ عناصر اپنے مقاصد کے لئے عوامی رائے کی بجائے تشدد کا راستہ اختیار کرنا چاہتے ہیں۔

خواجہ آصف نے کہا کہ پولیس اور سکیورٹی عملے کو نشانہ بنایا گیا، اور ان کی لاشوں کی بے حرمتی کی گئی۔ اس سے ظاہر ہوتا ہے کہ یہ عناصر انتخابات کے ذریعے عوامی رائے کی مخالفت کر رہے ہیں۔

انہوں نے مزید کہا کہ اگر کوئی ریاست مخالف ایجنڈا تشدد کے ذریعے مسلط کرنا چاہتا ہے تو حکومت قانون کو پوری قوت کے ساتھ نافذ کرے گی۔ ریاست کشمیری عوام کو اپنی رائے کا آزادانہ استعمال کرنے کا موقع دے گی۔

یاد رہے کہ آزاد کشمیر میں حالیہ دنوں میں ریاست مخالف سرگرمیوں میں اضافہ ہوا ہے، جس پر حکومتی سطح پر کارروائی کا فیصلہ کیا گیا ہے۔