اسلام آباد: (رائیٹ ناؤنیوز) وفاقی وزیر اطلاعات و نشریات عطاء اللہ تارڑ نے پاک چین تعلقات کی 75ویں سالگرہ پر خوشی کا اظہار کیا ہے۔ انہوں نے کہا کہ دونوں ممالک کے تعلقات ہر آزمائش پر پورے اترے ہیں اور یہ دوستی دونوں ممالک کے لیے باعثِ مسرت ہے۔

عطاء تارڑ نے سی پیک کی تعمیر اور گلوبل گورننس اقدامات کے حوالے سے تقریب میں شرکت کی۔ انہوں نے کہا کہ پاکستانی قوم پاک چین دوستی کا جشن منا رہی ہے اور پاکستان کی قیادت چین کے ساتھ مضبوط تعلقات پر یقین رکھتی ہے۔

انہوں نے مزید کہا کہ پاکستان اور چین کے تعلقات صرف سفارتی نہیں بلکہ عوامی سطح پر بھی مضبوط ہیں۔ وزیراعظم کے حالیہ دورہ چین نے دو طرفہ تعاون کو نئی بلندیوں تک پہنچا دیا ہے۔

وزیر اطلاعات نے کہا کہ سی پیک چین کے ایک خطہ، ایک سڑک اقدام کا اہم حصہ ہے اور یہ منصوبہ پاکستان میں ترقی اور خوشحالی کو فروغ دے رہا ہے۔ دونوں ممالک کے درمیان ثقافتی اور میڈیا تعاون بڑھ رہا ہے۔

یاد رہے کہ عطاء تارڑ نے پنجاب حکومت میں بطور نوجوان آفیسر چین کے دورے کئے تھے۔ انہوں نے کہا کہ پاکستان گلوبل ڈویلپمنٹ انیشی ایٹو کو آگے بڑھانے اور چین کے ساتھ ہر شعبے میں تعاون کو وسعت دینے کا ارادہ رکھتا ہے۔