اسلام آباد: (رائیٹ ناؤ نیوز) آئی ایم ایف نے مشکوک مالی ٹرانزیکشن پر تشویش کا اظہار کرتے ہوئے حکومت کو منی لانڈرنگ کے خلاف سخت اقدامات کی ہدایت دی ہے۔ آئندہ مالی سال کے بجٹ سے متعلق آئی ایم ایف نے حکومت کو فوری اور موٴثر اقدامات کرنے کا کہا ہے۔

ذرائع کے مطابق آئی ایم ایف نے حکومت پر زور دیا ہے کہ ٹریڈ بیسڈ منی لانڈرنگ کے خلاف فوری کارروائی کی جائے۔ آئی ایم ایف نے منی لانڈرنگ روکنے کیلئے بینی فیشل اونرشپ کی معلومات کے تبادلے میں خامیاں دور کرنے کی ضرورت پر زور دیا ہے۔

آئی ایم ایف نے مالیاتی نگرانی کے نظام کو سخت بنانے کا مطالبہ کیا ہے تاکہ تجارت کی آڑ میں ہونے والی منی لانڈرنگ کو روکا جا سکے۔ آئی ایم ایف نے بینکاری اور غیر مالیاتی کاروباری اداروں میں مشکوک لین دین کی نگرانی پر بھی تشویش کا اظہار کیا ہے۔

آئی ایم ایف کی جانب سے بعض شعبوں میں کالے دھن اور غیر ٹیکس شدہ سرمایہ کاری کی نشاندہی کی گئی ہے۔ یہ اقدامات مالی نظام کی شفافیت کے لئے ضروری ہیں۔

واضح رہے کہ حکومت نے مالیاتی شعبے میں شفافیت بڑھانے کے لئے پہلے بھی متعدد اقدامات کیے ہیں۔ منی لانڈرنگ کے خاتمے کے لئے مزید اقدامات کی ضرورت محسوس کی جا رہی ہے۔