اسلام آباد: (رائیٹ ناوٴ نیوز) نائب وزیر اعظم اسحاق ڈار نے سینیٹ اجلاس میں انکشاف کیا کہ اسرائیل نے ایران پر بڑا حملہ کیا، جس کے جواب میں ایران نے سعودی عرب کے آئل ڈپو کو نشانہ بنایا۔ یہ حملے خطے میں کشیدگی بڑھانے کا سبب بنے۔

انہوں نے کہا کہ کل تک معاملات مثبت سمت میں جا رہے تھے، مگر اب بھی کوشش جاری ہے کہ حالات کو سنبھالا جائے۔ انہوں نے واضح کیا کہ ایران پر حملے کے وقت وہ مدینہ میں تھے اور وہیں سے پاکستان کی جانب سے مذمت کی ہدایت دی۔

نائب وزیر اعظم نے بتایا کہ پاکستان پہلا اسلامی ملک تھا جس نے ایران پر حملے کی مذمت کی۔ انہوں نے ایرانی وزیر خارجہ عباس عراقچی سے فوری رابطہ بھی کیا۔

انہوں نے کہا کہ پاکستان اس وقت ثالثی کا کردار ادا کر رہا ہے، اور وزیر اعظم شہباز شریف اور فیلڈ مارشل عاصم منیر نے اس عمل میں اہم کردار ادا کیا۔ انہوں نے مزید کہا کہ گروپ آف فور کی میٹنگ اسلام آباد میں ہوئی، جس میں جنگ کے دونوں فریقین شریک ہوئے۔

واضح رہے کہ خطے کی بدلتی صورتحال میں پاکستان کی سفارتی کوششیں جاری ہیں۔ پاکستان خود کو متحرک ثالث کے طور پر پیش کر رہا ہے تاکہ جنگ کا دائرہ وسیع نہ ہو۔