پشاور: (رائیٹ ناوٴ نیوز) پی ٹی آئی کے مرکزی ڈپٹی سیکرٹری اطلاعات شوکت یوسف زئی نے کہا ہے کہ عمران خان کو جیل میں بنیادی علاج کی سہولیات سے محروم رکھا جا رہا ہے جس سے ان کی ایک آنکھ ضائع ہونے کا خدشہ ہے۔ انہوں نے سپریم کورٹ سے فوری ایکشن لینے اور جیل سپرنٹنڈنٹ و وزیراعلیٰ مریم نواز کے خلاف ایف آئی آر درج کرنے کا مطالبہ کیا۔

انہوں نے مزید کہا کہ وفاقی وزرا جھوٹ بولتے رہے ہیں کہ عمران خان کو جیل میں اضافی سہولیات میسر ہیں جبکہ سلمان صفدر کی رپورٹ نے ان کا جھوٹ بے نقاب کر دیا۔ عمران خان کو جیل میں بجلی کی عدم موجودگی اور دیگر بنیادی سہولیات کی کمی کا سامنا ہے۔

یوسف زئی نے تشویش کا اظہار کیا کہ عمران خان کو نہ صرف علاج سے محروم رکھا گیا بلکہ معیاری کھانا اور دیگر سہولیات بھی فراہم نہیں کی جا رہیں۔ انہوں نے جیل سپرنٹنڈنٹ اور وزیراعلیٰ پنجاب کے خلاف غفلت کا الزام عائد کیا۔

شوکت یوسف زئی نے امید ظاہر کی کہ سلمان صفدر کی رپورٹ کے بعد سپریم کورٹ اقدام کرے گی اور عمران خان کی فیملی کو ملاقات کی اجازت دے گی۔ انہوں نے کہا کہ عمران خان کی صحت پر سمجھوتا نہیں کیا جائے گا اور ان کا علاج ان کی مرضی کے ڈاکٹروں سے کرایا جائے۔