اسلام آباد: (رائیٹ ناوٴ نیوز) رواں مالی سال کے پہلے پانچ ماہ یعنی جولائی تا نومبر 2025 کے دوران پاور سیکٹر کے سرکلر ڈیٹ میں 223 ارب روپے کا اضافہ ہوا، جس سے یہ رقم 1837 ارب روپے تک پہنچ گئی۔ جون 2025 میں یہ ڈیٹ 1614 ارب روپے تھا۔

سرکلر ڈیٹ میں یہ اضافہ حکومت اور بینکوں کے درمیان ستمبر 2025 میں معاہدوں کے باوجود ہوا، جن کا مقصد ایک ہزار 225 ارب روپے کم کرنا تھا۔ اکتوبر اور نومبر 2025 کے دوران سرکلر ڈیٹ میں 144 ارب روپے کا مزید اضافہ ہوا۔

نومبر 2025 تک سرکلر ڈیٹ 1837 ارب روپے رہا، جبکہ ستمبر 2025 میں یہ 1693 ارب روپے اور جون 2025 میں 1614 ارب روپے تھا۔ نومبر 2024 کے مقابلے میں نومبر 2025 میں سرکلر ڈیٹ میں 544 ارب روپے کی کمی بھی دیکھی گئی، کیونکہ نومبر 2024 میں یہ رقم 2381 ارب روپے تھی۔