سڈنی: (رائیٹ ناؤ نیوز) آسٹریلیا کے سائنس دانوں نے قدرتی آفات میں پھنسے افراد تک ادویات پہنچانے کے لیے خاص کاکروچ تیار کرلیے ہیں۔ ان کاکروچز کو کائیبورگ (cyborg) کاکروچز کہا جاتا ہے، جو جدید کیمروں اور انجیکشن آلات سے لیس ہیں۔

محققین نے بتایا کہ ان کاکروچز کو paraborgs کا نام دیا گیا ہے، جو اعصابی نظام میں نصب الیکٹروڈز کے ذریعے دور سے کنٹرول کیے جا سکتے ہیں۔ یہ کاکروچ تنگ اور دشوار راستوں سے گزر کر متاثرہ افراد تک ادویات پہنچانے کی صلاحیت رکھتے ہیں۔

تجربات میں ان کاکروچز کی دوا پہنچانے کی کامیابی کی شرح 72 فیصد جبکہ قریبی فاصلے پر 95 فیصد رہی۔ اس کامیابی کے بعد یہ امید کی جا رہی ہے کہ مستقبل میں یہ کاکروچ زلزلوں، عمارتیں گرنے اور دیگر ہنگامی حالات میں مددگار ثابت ہوں گے۔

یہ کاکروچ متاثرہ علاقوں میں فوری امداد کی ترسیل کو ممکن بنائیں گے اور انسانی جانوں کو بچانے میں اہم کردار ادا کریں گے۔ یہ پیش رفت قدرتی آفات میں امدادی کاموں کے لیے ایک نیا راستہ کھول سکتی ہے۔

یاد رہے کہ قدرتی آفات کے دوران عموماً دشوار گزار راستے امدادی کاموں میں رکاوٹ بنتے ہیں۔ ان حالات میں کائیبورگ کاکروچز کی تیز رفتار ترسیل ایک اہم کامیابی ہو سکتی ہے۔