انقرہ: (رائیٹ ناؤنیوز) ترکیے کے صدر رجب طیب اردوان اور امریکی صدر ڈونلڈ ٹرمپ کے درمیان ٹیلیفونک رابطہ ہوا ہے۔ دونوں رہنماؤں نے دوطرفہ تعلقات اور ایران اور غزہ کی جنگوں پر گفتگو کی ہے۔

ترک صدارتی دفتر کے مطابق، اس بات چیت میں دونوں رہنماؤں نے پاکستان اور سعودی عرب کے ساتھ دفاعی معاہدے پر بھی تبادلہ خیال کیا ہے۔ اس دوران اردوان نے ٹرمپ کو ایران کے ساتھ بات چیت جاری رکھنے کی ضرورت پر زور دیا ہے۔

صدر اردوان نے کہا ہے کہ سفارتکاری سے فائدہ اٹھانا ضروری ہے اور ترکیے اس سلسلے میں اپنا کردار ادا کرنے کے لیے تیار ہے۔ انہوں نے ایران کے حوالے سے ترکیے کی پیش کش بھی دہرائی ہے۔

یہ مشورہ ایسے وقت آیا ہے جب اسرائیل غزہ میں فلسطینیوں پر حملے جاری رکھے ہوئے ہے۔ اردوان نے کہا ہے کہ امن منصوبے کے دوسرے مرحلے کے نفاذ کے وقت یہ حملے ہورہے ہیں۔

واضح رہے کہ ترکیے اور امریکہ کے درمیان کئی موضوعات پر اختلافات موجود ہیں، جن میں ایران اور غزہ کی صورتحال شامل ہیں۔