تہران: (رائیٹ ناؤنیوز) ایران نے 18 جون کو امریکا کے ساتھ ہونے والے معاہدے کی 60 روزہ مذاکراتی مدت کو غیر متعلق قرار دے دیا ہے۔ ایرانی وزارت خارجہ کے ترجمان کا کہنا ہے کہ امریکا کی مبینہ خلاف ورزی کے باعث ڈیڈ لائن کی اہمیت ختم ہوگئی ہے۔

ترجمان اسماعیل بقائی نے وضاحت کی کہ معاہدے میں 60 دن کی کوئی باضابطہ شق نہیں تھی۔ ایران اپنی پالیسیاں دباؤ یا الٹی میٹم کی بنیاد پر نہیں بناتا۔

ان کا کہنا تھا کہ ایران پر عائد پابندیوں اور جوہری معاملات پر مذاکرات کے لیے 60 دن زیر غور تھے۔ لیکن امریکا کی خلاف ورزی سے بات چیت شروع نہیں ہو سکی۔

ایرانی ترجمان نے مزید کہا کہ مذاکراتی عمل آگے نہ بڑھنے کی وجہ سے مدت کی بحث غیر ضروری ہوگئی ہے۔ ایران کسی مخصوص مدت میں فیصلہ کرنے کے دباؤ میں نہیں آئے گا۔

یاد رہے کہ ایران نے آبنائے ہرمز کے معاملے پر اپنے حقوق کے حوالے سے قوانین کے نفاذ کا اعادہ کیا ہے۔ ایران کی پارلیمنٹ اور وزارت خارجہ اس معاملے پر تعاون کر رہی ہیں۔