اسلام آباد: (رائیٹ ناؤ نیوز) پٹرولیم ڈیلرز کے بعد آئل مارکیٹنگ کمپنیوں نے حکومت سے پرافٹ مارجن میں اضافے کا مطالبہ کیا ہے۔ آئل کمپنیز ایڈوائزری کونسل نے وفاقی وزیر پٹرولیم کو خط لکھ کر فی لیٹر پرافٹ مارجن میں فوری اضافے کی درخواست کی ہے۔

او سی اے سی کے مطابق آئل مارکیٹنگ کمپنیاں گزشتہ 3 سال سے پرافٹ مارجن میں اضافے کا مطالبہ کر رہی ہیں، لیکن ابھی تک پیش رفت نہیں ہوئی۔ کونسل کے مطابق مالی اور ریگولیٹری بوجھ کی وجہ سے کاروباری اخراجات پورے کرنا مشکل ہو رہا ہے۔

او سی اے سی کے سیکرٹری جنرل ناظر عباس زیدی نے کہا کہ موجودہ فی لیٹر پرافٹ مارجن 7 روپے 87 پیسے ہے، جس میں 2 روپے 23 پیسے کا اضافہ ہونا چاہیے۔ وفاقی وزیر پٹرولیم نے 1 روپے 22 پیسے اضافے کی یقین دہانی کرائی تھی۔

کونسل کے مطابق ملٹی نیشنل آئل انویسٹرز بھی بڑھتے ہوئے اخراجات اور مالی دباؤ کا شکار ہیں، جس کی وجہ سے موجودہ مارجن پر کاروبار جاری رکھنا مشکل ہو رہا ہے۔

واضح رہے کہ آئل مارکیٹنگ کمپنیوں نے حکومت سے مطالبہ کیا ہے کہ پرافٹ مارجن میں فوری اور مناسب اضافہ کیا جائے تاکہ مالی مشکلات کم ہوں اور پٹرولیم مصنوعات کی سپلائی مستحکم رہے۔