کراچی: (رائیٹ ناؤ نیوز) فلم ‘گھوسٹ اسکول’ کو سندھ میں نمائش کی اجازت نہ ملنے پر فلم سازوں نے سندھ ہائی کورٹ سے رجوع کر لیا ہے۔ درخواست گزاروں نے سندھ بورڈ آف فلم سینسرز کے فیصلے کے خلاف عدالت میں اپیل دائر کی ہے۔

سندھ ہائی کورٹ نے درخواست پر سندھ حکومت سمیت دیگر فریقین کو نوٹس جاری کرتے ہوئے 21 اگست تک جواب طلب کر لیا ہے۔ عدالت نے سینسر بورڈ کے فیصلے پر سوالات اٹھائے ہیں۔

درخواست گزاروں کے وکیل نے بتایا کہ پنجاب اور سینٹرل سینسر بورڈز نے فلم کی نمائش کی اجازت دے دی ہے، جبکہ سندھ بورڈ اعتراضات کر رہا ہے۔ وکیل نے عدالت کو آگاہ کیا کہ فلم میں کوئی قابل اعتراض مواد نہیں ہے۔

فلم پر پابندی سے متعلق وکیل نے مزید کہا کہ سندھ موشن ایکٹ 2011 کے تحت کسی فلم کو مخصوص قانونی بنیادوں پر ہی روکا جا سکتا ہے۔ فلم سازوں کا مؤقف ہے کہ ان کی فلم ان قانونی بنیادوں پر پورا اترتی ہے۔

واضح رہے کہ فلم ‘گھوسٹ اسکول’ گھوسٹ اسکولز کے مسئلے کو اجاگر کرتی ہے اور برطانیہ کے ایشین فلم فیسٹیول میں بہترین ہدایت کاری کا ایوارڈ بھی جیت چکی ہے۔