پاناما: (رائیٹ ناؤ نیوز) امریکی وزیر جنگ پیٹ ہیگستھ نے لاطینی امریکی ممالک سے عالمی فوجداری عدالت (آئی سی سی) چھوڑنے کا مطالبہ کیا ہے۔ انہوں نے کہا کہ آئی سی سی قومی خودمختاری کو متاثر کر رہی ہے اور ملکی عدالتوں کے اختیارات میں مداخلت کر رہی ہے۔

پیٹ ہیگستھ نے پاناما میں خطاب کرتے ہوئے اتحادی ممالک کو آئی سی سی کی مداخلت کو مسترد کرنے کی ترغیب دی۔ ان کا کہنا تھا کہ عدالت سے دستبردار ہونا قومی خودمختاری کی حفاظت کے لئے ضروری ہے۔

انہوں نے کہا کہ ہر ملک کو اپنی افواج کے استعمال اور قومی دفاع سے متعلق فیصلے خود کرنے کا حق ہونا چاہیے۔ حکومتوں کو غیر منتخب بین الاقوامی اداروں کے بجائے اپنے عوام کے سامنے جوابدہ ہونا چاہیے۔

یہ معاملہ اس وقت مزید اہم ہو گیا ہے جب آئی سی سی نے نومبر 2024 میں اسرائیلی وزیراعظم اور سابق وزیر دفاع کے خلاف غزہ میں جنگی جرائم کے الزامات پر وارنٹ جاری کیے۔ اس کے بعد واشنگٹن کی جانب سے عدالت پر دباؤ بڑھا ہے۔

واضح رہے کہ امریکہ اور اس کے اتحادی ممالک کے درمیان آئی سی سی کی مداخلت پر طویل عرصے سے تناؤ پایا جاتا ہے، جو قومی خودمختاری کے مسائل کو جنم دے رہا ہے۔