کراچی میں اقلیتی حقوق مارچ کے دوران 11 مطالبات پیش کیے گئے، جن میں جبری تبدیلی مذہب کے خاتمے پر زور دیا گیا۔
کراچی: (رائیٹ ناؤنیوز) کراچی میں مزار قائد کے باہر اقلیتی حقوق مارچ کا انعقاد ہوا۔ اس مارچ میں سول سوسائٹی اور اقلیتی برادری کے رہنماؤں نے شرکت کی۔
مارچ کے دوران قائداعظم کے 11 اگست 1947 کے خطاب کا حوالہ دیتے ہوئے پاکستان کے خواب کو یاد دلایا گیا۔ شرکا نے قوانین اور پالیسیوں میں اصلاحات کا مطالبہ کیا۔
مارچ میں انسانی حقوق کے کارکنان، سیاسی و سماجی شخصیات نے شرکت کی۔ انہوں نے تشدد، عدم مساوات اور جبری تبدیلی مذہب پر گہری تشویش کا اظہار کیا۔
مارچ کے منتظمین نے حکومت سے آئینی و قانونی اصلاحات کا مطالبہ کیا۔ انہوں نے تعلیمی اداروں میں اقلیتوں کے لیے کوٹہ اور نصاب سے نفرت انگیز مواد کے خاتمے کا مطالبہ کیا۔
یاد رہے کہ اقلیتی حقوق مارچ کا مقصد مساوات، وقار اور انصاف کے لیے آواز بلند کرنا تھا۔ منتظمین کا کہنا ہے کہ جدوجہد جاری رہے گی اور سب کے لیے مساوات کا مطالبہ کیا جاتا رہے گا۔
